Shacabka Soomaaliyeed ee ku nool dalka Belgium ayaa qabtay mudaaharaad ballaaran oo ay si cad kaga soo horjeedaan faragelinta qaawan ee ay Israa’iil ku hayso midnimada iyo madax-bannaanida Jamhuuriyadda Federaalka Soomaaliya.
Mudaaharaadkan oo si weyn loo soo agaasimay ayaa ka dhacay afaafka hore ee xarunta Midowga Yurub ee magaalada Brussels, halkaas oo ay isugu soo baxeen boqolaal Soomaali ah oo ka kala yimid magaalooyin kala duwan oo dalka Belgium ah iyo dalal kale oo daris la ah.Dadweynaha mudaharaadayay ayaa watay calanka Soomaaliya, boorar ay ku qornaayeen halku-dhigyo muujinaya midnimada ummadda Soomaaliyeed, iyo farriimo cambaareynaya faragelinta shisheeye ee lagu tilmaamay mid dhaawac ku ah qarannimada iyo jiritaanka Soomaaliya. Qaar kamid ah halku-dhigyada la maqlayay waxaa ka mid ahaa “Soomaaliya waa hal qaran”, “Faragelinta shisheeye hala joojiyo”, iyo “Midnimada Soomaaliya lama kala jabin karo”.Ujeeddada ugu weyn ee mudaaharaadkan ayaa ahayd in la gaarsiiyo beesha caalamka, gaar ahaan Midowga Yurub, dareenka iyo walaaca ay qabaan shacabka Soomaaliyeed ee qurbaha ku nool ee ku aaddan doorka ay Israa’iil ku lug yeelanayso arrimaha gudaha Soomaaliya. Dadka mudaharaadayay ayaa sheegay in faragelin kasta oo shisheeye oo lagu sameeyo arrimaha siyaasadeed, amni iyo midnimo qaran ay tahay mid ka hor imaaneysa rabitaanka shacabka Soomaaliyeed iyo mabaa’diida caalamiga ah ee ixtiraamka madax-bannaanida dalalka.Qaar kamid ah odayaasha,
aqoonyahannada iyo dhalinyarada ka hadlay mudaharaadka ayaa si adag u cambaareeyay waxa ay ku tilmaameen qorshayaal lagu wiiqayo midnimada Soomaaliya, iyagoo xusay in shacabka Soomaaliyeed ay horey u soo mareen dhibaatooyin badan oo ka dhashay faragelin shisheeye iyo kala qaybsanaan siyaasadeed. Waxay ku adkeeyeen in maanta loo baahan yahay midnimo qaran, wadajir, iyo in laga feejignaado cid kasta oo dano gaar ah ka leh mustaqbalka Soomaaliya.
Mid kamid ah khudbadihii laga jeediyay fagaaraha mudaharaadka ayaa lagu yiri, “Soomaaliya ma aha dal cid walba ku tijaabin karto danoheeda siyaasadeed ama amni. Waxaan halkan u joognaa inaan caalamka u sheegno in shacabka Soomaaliyeed ay diidan yihiin faragelin kasta oo lagu kala fogeynayo walaalahooda, laguna dhaawacayo midnimada qarankooda.”
Hadalkan ayaa sacab iyo taageero ballaaran ka helay dadkii isugu soo baxay mudaaharaadka.Dhalinyarada Soomaaliyeed ee ku nool Belgium ayaa door weyn ka qaatay abaabulka iyo hoggaaminta mudaaharaadkan. Waxay sheegeen in iyaga oo ku nool qurbaha aysan ka aamusnaan karin arrimaha saameynaya dalkooda hooyo. Waxay carrabka ku adkeeyeen in waajib qaran uu ka saaran yahay in ay u istaagaan difaaca midnimada Soomaaliya,
kana hortagaan dacaayad ama faragelin kasta oo lagu wiiqayo jiritaanka qaranka.Mudaaharaadkan ayaa sidoo kale fariin u diray Midowga Yurub, iyadoo dadkii ka qaybgalay ay dalbadeen in hay’adaha Yurub ay si dhexdhexaad ah u wajahaan arrimaha Soomaaliya, kana fogaadaan taageeridda ama indho-tiridda faragelin shisheeye oo ka imaanaysa dal kasta. Waxay ku baaqeen in Midowga Yurub uu door ka qaato nabadda,
xasilloonida, iyo dib u dhiska Soomaaliya, halkii uu u oggolaan lahaa in dano shisheeye ay carqaladeeyaan horumarka dalka.Gabagabadii, mudaaharaadka ay qabteen shacabka Soomaaliyeed ee ku nool Belgium wuxuu ahaa mid muujinaya wacyiga, dareenka waddaninimo, iyo midnimada ay Soomaalidu u leedahay dalkeeda hooyo, xitaa marka ay ku nool yihiin qurbaha. Waxay caddeeyeen in codkooda la maqli doono, islamarkaana aysan ka harayn difaaca midnimada iyo madax-bannaanida Soomaaliya. Mudaaharaadkan ayaa noqday fariin xooggan oo u dirtay caalamka, gaar ahaan hay’adaha caalamiga ah, kuna saabsan in Soomaaliya ay leedahay dad u diyaarsan inay ka hortagaan faragelin kasta oo khatar gelinaysa jiritaanka qarankooda.
